(प्रदीप जोशी, पत्रकार, विटे )
स्वच्छतेच्या क्षेत्रात सातत्याने अग्रेसर असणाऱ्या विटा नगरपरिषदेने पुन्हा एकदा देशाच्या शिरपेचात मानाचा तुरा खोवला आहे. केंद्र शासनाच्या ‘स्वच्छ सर्वेक्षण मिशन शहरी विभाग अभियान’ अंतर्गत घेण्यात आलेल्या ‘सुपर स्वच्छ लीग’ स्पर्धेत विटा नगरपरिषदेने देशभरातून पहिला क्रमांक पटकावला आहे. या दिमाखदार यशाचे वृत्त कळताच विटा शहरात उत्साहाचे वातावरण निर्माण झाले असून, ठिकठिकाणी आनंदोत्सव साजरा करण्यात आला.
शहरात जल्लोष अन् कर्मचाऱ्यांचे कौतुक
या ऐतिहासिक विजयानिमित्त विटा शहरातील छत्रपती शिवाजी महाराज चौकात मोठा जल्लोष करण्यात आला. यावेळी माजी उपनगराध्यक्ष संजय भिंगारदिवे, माजी नगरसेवक कृष्णातअण्णा गायकवाड, अमर शितोळे, रणजीत पाटील, समीर कदम, मंथन मेटकरी, रामचंद्र भिंगारदेवे, विठ्ठल भिसे, राजू जाधव, राजू राठोड यांच्यासह स्वच्छता अभियानातील खासगी ठेकेदाराकडील कर्मचाऱ्यांनी एकत्र येत फटाके फोडून आपला आनंद व्यक्त केला.
याप्रसंगी बोलताना माजी उपनगराध्यक्ष संजय भिंगारदिवे यांनी आमदार सुहास बाबर आणि माजी नगरसेवक कृष्णाअण्णा गायकवाड यांच्या मार्गदर्शनाखाली साई गणेश संस्थेच्या वतीने राबवण्यात आलेल्या स्वच्छता अभियानाच्या ठेकेदाराचे आणि त्यांच्या कर्मचाऱ्यांचे विशेष कौतुक केले. ते म्हणाले, “या कर्मचाऱ्यांनी ठेका घेतल्यापासून अनेक प्रयत्नातून हे यश मिळवले आहे, त्याबद्दल सर्वांचे अभिनंदन.”
विटा नगरपालिकेचे अधिकारी स्वप्नील खामकर यांनी या यशाबद्दल माहिती देताना सांगितले की, देशपातळीवर घेण्यात आलेल्या या स्पर्धेत विटा नगरपरिषदेसोबतच पुणे जिल्ह्यातील सासवड नगरपरिषद आणि नाशिक जिल्ह्यातील देवळाली प्रवरा नगरपरिषद यांचीही निवड झाली आहे. या तिन्ही नगरपरिषदांना १७ जुलै रोजी नवी दिल्ली येथील संसद भवनात भारताच्या राष्ट्रपतींच्या हस्ते सन्मानपत्र व बक्षीसपत्र प्रदान करण्यात येणार आहे.
विटा नगरपरिषदेने स्वच्छ सर्वेक्षण अभियानात सातत्याने उत्कृष्ट कामगिरी केली आहे. २०१९ मधील यश विशेष उल्लेखनीय ठरले होते:
२०१९ मध्ये विटा नगरपरिषदेने १ लाखापेक्षा कमी लोकसंख्या असलेल्या शहरांच्या श्रेणीत देशभरात पहिला क्रमांक पटकावला होता. याच श्रेणीत महाराष्ट्रातील लोणावळा आणि सासवड या शहरांनी अनुक्रमे दुसरा आणि तिसरा क्रमांक मिळवला होता.
याशिवाय, पश्चिम विभागातील स्वच्छ शहरांमध्येही विटा नगरपरिषदेने प्रथम क्रमांकाचा पुरस्कार पटकावला होता. हे यश विटा नगरपालिकेने ‘नॉन-अमृत’ (Non-Amrut) प्रवर्गात मिळवले होते.
या उल्लेखनीय कामगिरीबद्दल २३ जुलै २०१९ रोजी मुंबई येथे तत्कालीन मुख्यमंत्री देवेंद्र फडणवीस यांच्या हस्ते विटा नगरपालिकेचा सन्मान करण्यात आला होता. त्यावेळी विटा पालिकेच्या नगराध्यक्षा प्रतिभा पाटील, स्वच्छता अभियानाचे ब्रँड अँबेसिडर माजी नगराध्यक्ष ॲड. वैभव पाटील, मुख्याधिकारी महेश रोकडे, उपनगराध्यक्ष दहावीर शितोळे, आरोग्य सभापती ॲड. विजय जाधव यांच्यासह सर्व नगरसेवक व पदाधिकारी उपस्थित होते.
विटा नगरपालिकेने वर्षभर शहरात राबवलेल्या स्वच्छता मोहिमेला विटेकर नागरिकांनी दिलेल्या उत्स्फूर्त प्रतिसादामुळेच हे यश मिळाल्याचे त्यावेळी नमूद करण्यात आले होते. हे यश विटा शहराच्या स्वच्छतेप्रती असलेल्या कटिबद्धतेचे आणि नागरिकांच्या सक्रिय सहभागाचे प्रतीक आहे. ‘सुपर स्वच्छ लीग’ मधील आताचा प्रथम क्रमांक हा विटा शहराच्या स्वच्छतेच्या वाटचालीतील आणखी एक महत्त्वाचा टप्पा ठरला आहे.
